Ehrenmitglied

Wer sich für den Automobilsport im allgemeinen oder für den Racing Club Airbag speziell engagiert hat, kann durch die Generalversammlung zum Ehrenmitglied ernannt werden.

Ehrenmitglieder müssen keine Jahresbeiträge bezahlen. Es stehen ihnen alle passiven Mitgliederrechte zu.

Rechsteiner Birgit

Huwiler Denise Denise

An der GV 2022 mussten wir Denise und Birgit aus dem Vorstand ziehen lassen. Flo hat zu dieser "Verabschiedung" folgenden Text verfasst:


Ich han mier im Vorfeld vo därä GV chli Gedanke gmacht was mer zu däm Gegebene Alass so chönti säge. Und dänn hani gmerkt, dases eifach zvill isch. Alles zäme ischs zvill. D Denise und d Birgit verlönd dä Vorstand – dä Tom isch (scho sit eme Jahr!) nüm Präsi vom RCA. Wie söll mer das ine gueti Red verpacke?

Dä RCA isch im Januar 2006 gründet worde – vor insgesamt 17 Jahr. Das muen mer sich mal vor Auge füehre! 2006 isch das Jahr, wo ich no würkli wiit devo entfernt gsi bin, 26gi z werde. A absolut vorderster Front vom RCA sind vo afang a dä Tom und d Denise gsi. D Gründig vomene Club – oder eifach 'd Entstehig vonere Schnaps-Idee' isch s einte – aber eso e Idee au würkli durezzieh, i guete wie au in schlächtere Ziite zäme z stah, wiiter z mache und dra z blibe: Das isch di würklich Leistig.

Es hät mit unglaublich vill Energie und eme zimlich stuure Grind ztue. Oder zwi. Mit wahnsinnig vill froid a dä Sach. Ohni därä Froid, wäred mier alli nöd da.

Was iär gmacht händ – wie niemert suscht – isch: anderi begeisteret. Iär händ s Benzin im Bluet – und sind immer au aktiv uf anderi zue gange. Früener vor allem i dä verschidne Internetforene, hüt uf Facebook und vor allem uf dä Rännplätz. Inzwüsche kännt mer s Huwilers und dan ihne dä RCA uf jedem Rännplatz i dä Schwiiz.

Und wies so isch – gleich und gleich gesellt sich gern.

Und us genau däm Grund isch bald emal d Birgit dezue cho – sie isch - sowiit ich weiss – sit em Jahr 2006 debi. Agfange als Evogirl – isch sie bald au unter em Name Snoopy und später als Teil vo dä Legendäre BMW-Tussi-Gäng fixe bestandteil vom Club gsi. En RCA ohni Birgit – das chan ich mier gar nöd vorstelle.

Au wänn du sit es paar Jahr nüme so aktiv uf em Rännplatz debi gsi bisch wie früener – d Legände läbt. Ich erinnere mich soo gern a all die Rännwuchenend und vor allem a sooo vill luschtigi Äbige zrug.

Zersch hani welle us alte RCA-Rennbrichte use zitiere. Aber: das gat eifach nöd. Es sind sooo vill tolli Bricht. So viel Anektote und Erinnerige. Mer müsst es Buech drus mache, würkli! Ou – da isch sie ja, die Idee😊

Iär werdeds nöd glaube. Es sind sage und schriebe 82(!!) Rännbricht online! Zum glück sind spätischtens ab em Jahr 2011 alli uf Facebook gsi – susch hettedmer inzwüsche mehreri so dicki Büecher gfüllt.

Ich ha nur scho für s Abspeichere e Ewigkeit gha. Es 248 Siitigs Pdf hani generiert. Und will weder d Qualität vo dä Bilder no s – nöd würkli einheitliche – Layout vo dä Bricht für en professionelle Druck glanget hetted, hanis mer eifach gmacht – da händer es paar Mäppli zum duregüxle.

Dä Wahnsinn isch: anhand vo dänä Brichte weiss ich gnau wider wänn mini Tochter zügt worde isch (Eggefälde/Waldkraiburg 2008), wänn sich d Schwangerschaft mal sehr dütlich bemerkbar gmacht hät (Mandement 2008), wänn ich sälber gwüsst han das sie unterwägs isch (Grenche 2008) und wänn sie a ihres erschte Ränne hät därfe mitcho (Röthis 2009)!

Dä Tom isch bereits sit em letschte Jahr nüme oise El Presidente. Dä Mario hät sich bereit erklärt, die Ufgabe z überneh. Für das möcht ich a därä Stell am Mario i aller Form danke und klar säge: Huet ab.

Danke aber au dir Tom – dass du ihn wiiterhin au als Teil vom Vorstand duesch unterstütze. Dä RCA isch dis Baby – und ich finds guet, lasch es langsam und behuetsam wiiterlaufe. Aber vor allem möcht ich dir hüt Danke säge für dä riesig Ufwand wo du gha häsch i dänä 17 Jahr RCA.

Dä eint oder ander Striit häsch der nöd entga la, BMWs sind cho und gange – und au d Mänsche wo 'dä härti Chern' vom RCA bildet händ sich veränderet. Au du häsch dich veränderet😊 Alles i allem sind mer hüt bi rund 74 Mitglieder (46 aktivi Fahrer und 28 wiiteri Mitglieder) und ich bin sicher – iär alli gebed mir rächt, wänn ich säge: es isch zumene sehr grosse Teil din verdienscht, dass mier hüt dä beschti Rännclub i dä Schwiiz sind.

Verabschide us em Vorstand düend mer hüt aber zwei anderi.

Danke dir, Denise, für all die Protokoll wo du gfüehrt häsch, für all die Energie wo du brucht häsch i dä Rolle vo dä First Lady vom RCA. Ohni dich wär dä Club hüt bestimmt nöd da wo er isch.

Danke Birgit, dass du dä Undankbari Job vo dä Buechhalterin über no hät. Garantiert hät niemals öper anders d Finanze vomene Club uf so kreativi und churzwiligi Art chöne übere bringe wie du.